Komuniga Maŝino:Blogo de Amelano

나는 너에 합의한다 이다. 그것은 이렇게 이다.

cxu vi legis tion
http://www.xs4all.nl/~pilger/wfp/bl-50921.htm

2005-09-21 Duboj pri la Atako al la Turoj -- en la Monda Tago de Paco (UN)
Serĉante en la paĝaro de Roedy Green (vidu 2005-09-19) manieron por kontakti, mi vidis mencion "9/11: an inside job?" (11 sep.: ĉu mem organizita?). Tio instigis min plue okupiĝi pri blogaĵo, kiun mi komencis verki pli frue. (Iuj inter vi eble vidis, ke tia teksto aperis en mia blogo je 2005-09-09, sed tagon poste denove malaperis (ĉar mi ne estis kontenta pri ĝi).) Mi supozas, ke Roedy Green verkis pli amplekse pri la temo, sed mi renkontis nur kelkajn mallongajn reagojn. Mi do donas mian propran tekston.


Antaŭ du semajnoj, mi vidis televidan intervjuon kun Brita eks-ministro Michael Meacher kaj Germana eks-ministro Andreas von Bülow, kiuj metis, mi diru, interesajn demandsignojn ĉe tio, kio okazis antaŭ, dum kaj post la "11a de septembro" (la Atako al la Turoj).
Ili menciis plurajn punktojn, kiuj sugestas, ke la Usona registaro (respektive la reakciaj rondoj, kun kiuj ĝi rilatis/as) aktive malhelpis al la (ebla) prevento de tiu Atako, ĉar ĝi precize estis tiu "nova Pearl Harbor", pri kiu (jam antaŭ 2000) ili esperis.

Ĉi tio ne estas unu el tiaj konspiro- teorioj de sensaciemaj ĵurnalistoj aŭ fantaziemaj verkistoj. Estas pripensaĵoj de homoj, kiuj funkciis en registaroj de landoj, de kies regantoj oni atendas iom da seriozeco. Kaj fakte la punktoj, kiujn ili menciis, estas konataj kaj kontroleblaj.

Kompreneble ankaŭ mi jam tuj post la Atako al la Turoj cerbumis pri tio, kia kialo povus ekzisti por tia atako, kaj kiuj povus havi avantaĝon pro ĝi. Estis klare al mi, ke la planintoj sciis bonege, kiel funkcias la sistemo de televido kaj radio en la nuna mondo. Ili povis antaŭvidi, ke tuj post kiam la unua aviadilo trafis turon, "ĉiuj" tv-kanaloj en la mondo estus direktitaj al la turoj, kaj rekte montrus la duan atakon. Ili povis atendi ankaŭ, ke dum multaj tagoj, tiuj bildoj estus daŭre kaj ripete montrataj. Tiel en multaj landoj de la mondo, multaj homoj ricevis ripete grandan ŝokon -- senkompare pli grandan, ol se ie per akcidento de trajno aŭ per fabrika eksplodo, 3000 homoj estus pereintaj.

La eksministroj Meacher kaj Von Bülow, sed ankaŭ ekzemple la Brita ĵurnalisto John Pilger (ne parenco, laŭ mia scio) atentigas pri multaj okazaĵoj antaŭ, dum, kaj post la Atako al la Turoj, kiuj almenaŭ supozigas, ke iuj rondoj en Usono pli sciis pri la afero, ol ili agnoskas. Ne havas sencon, ke mi denove listigu ilin. Vi trovos ĉion, en lingvoj eble al vi konataj, kiam vi guglos tiujn tri nomojn menciitajn, kune aŭ aparte.

Eblas diversaj interpretoj.

A. ``La Atako al la Turoj estis plena surprizo por la Usonaj superaj instancoj.´´ -- Tio estas la plej nekredinda. La Usonaj sekretaj servoj, eĉ laŭ oficialaj raportoj, estis ricevintaj avertojn de multaj flankoj, pro kiuj la maniero, la dato, la nomoj de la atakontoj, kaj la financistoj de la atakontoj estis (aŭ povus esti) konataj. Oni asertas, ke tiuj avertoj ne atingis la superajn aŭ decidajn instancojn antaŭ ol okazis la Atako, sed laŭ ĉiuj raportoj, ili ja estis transdonitaj "supren", kaj iuj avertoj, laŭ la raportoj, ja atingis la registaron aŭ ĝian respondeculinon pri sekureco (t.e. la nuna ministro pri Eksteraj Aferoj) antaŭ la Atako.

B. ``Usonaj instancoj mem organizis la Atakon al la Turoj.´´ -- Kvankam la Atako aspektas perfekte reĝisorita por la bezonoj de la Usonaj amas-medioj naciaj kaj internaciaj, mi tion ne kredas. Ne pro tio, ke mi pensas, ke en Usonaj registaraj kaj apud- registaraj rondoj ne ekzistis/as homoj, kiuj pretus organizi ion tian: makiavelismo ja ne estas io fremda por tiuj, kaj pri mortigo de dek- aŭ centmiloj da senkulpaj homoj "por la bona celo" (Afganio, Irako,...) ili ne havas skrupulojn. Sed pro tio, ke mi pensas, ke ili ne kapablus organizi ion tian mem. Kiam oni en tiuj rondoj volas fari ion, oni prefere dungas privatan entreprenon por tio, aŭ sponsoras grupon, kiu pretas fari tion. Tiel Usono, laŭ pluraj raportoj, sponsoris la Araban Taĉmenton de Saudia (tiam ankoraŭ) milionulo Osama (el familio de karaj amikoj kaj komercaj partneroj de iuj Usonaj ĉefuloj...) por batali en Afganio kontraŭ la Sovetiaj okupantoj, per trejnado kaj per liverado de armiloj. Post la forpelo de la Rusoj, tiu Osama kun sia grupo serĉis kaj trovis novajn malamikojn... (Simile, Usono (kaj Pakistano) apogis la kontraŭ- Sovetiajn islamismajn grupojn, kiuj poste fariĝis Talibano.)
En multaj landoj dum la historio ja okazis, ke politikaj grupoj mem organizis "endanĝerigajn agadojn" kvazaŭ ilin iniciatis kontraŭuloj. Je 2004-11-14 mi menciis okazon, ke prezidanto de (malgranda) Nederlanda politika partio mem sendis al si kaj al sia partio minac-leterojn subskribitajn de iu islamisma organizaĵo. Hitlero en la jaroj 1930 povis ekhavi publikan apogon pro "terorismaj atakoj" laŭdire faritaj de komunistoj kaj socialistoj, sed en vero faritaj de Hitleranoj. Eble estas interese mencii, ke dum la lasta periodo de ekzisto de la Nederlanda komunista partio (jaroj '70-'80), multaj ĝiaj lokaj filioj povis funkcii nur per estraranoj kaj aktivaj membroj, kiuj praktike ĉiuj estis "talpoj" (sekretaj informantoj), kiuj do, laŭ malfermiĝintaj arĥivoj, precipe raportadis al siaj estroj de la sekreta servo unuj pri la aliaj (ne sciante, ke la aliaj estas "kolegoj"... Kaj, same laŭ malfermiĝintaj arĥivoj, iu "batalema" Maŭisma revoluciema grupo (laŭ la ideologio de Maŭ Zedong) en la jaroj '60, konsistis nur kaj ekskluzive el homoj de la sekreta servo (kiu fondis ĝin, kaj redaktis kaj multobligis ĝian ("subtere" distribuatan) tre ortodokse- maŭisman revueton.). (Amuze estis, kiel ĝia iama "ĉefa ideologo" rakontis pri sia renkontiĝo kun Maŭ mem okaze de internacia konferenco en Pekino... La Ĉinaj partiestroj amike premis la manon de dungito de la Nederlanda sekreta servo, pensante ke tiu estas samideano!) Tiel la Nederlanda sekreta servo garantiis sian ekzisto-rajton kiel kontraŭbatalantoj de tiaj danĝeraj movadoj.

C. ``Usonaj sekretaj servoj sciis, ke iuj Arabaj rondoj planas Atakon al la Turoj, sed nenion faris por malhelpi ĝin, ĉar tio "subfosus ilian inform- pozicion".´´ -- Tio estus paralela al la kazo pri la Brita urbo Koventro (Coventry) en 1940. La Britaj sekretaj servoj (kaj almenaŭ la ĉefministro) sciis, ke la Germana aerarmeo planas bombi ĝin. Oni tamen ne avertis la loĝantojn, nek evakuis la urbon, nek sendis Britajn aviadilojn por haltigi la Germanajn, ĉar... tiam la Germanoj scius, ke la Britoj povas subaŭskulti kaj deĉifri iliajn koditajn mesaĝojn, kaj ŝanĝus kanalojn kaj kodojn. Granda parto de la urbo ruiniĝis. Dekmiloj da viktimoj.
Ne malofte, polico kaj sekretaj servoj argumentas, ke ili ja eksciis pri la planado de iu krimo, sed ke ili ne povis ĝin malhelpi, ĉar tiam la krimuloj ekscius, ke oni aŭ sukcese subaŭskultas ilian komunikadon, aŭ havas "talpon" (informanton) en ilia krima organizaĵo. Do, por plue havi informojn pri planotaj krimoj, oni ne malebligas la efektivigon de la planitaj. Ke homoj mortas pro tio, estas nur flanka efiko. Pri la utilo de ekzisto de multmilhomaj servoj por ekscii pri planotaj krimoj, se oni tamen ne pretas preventi ilin, oni povas dubi.

Ĉ. ``Usonaj rondoj sciis, ke iuj Arabaj rondoj planas Atakon al la Turoj, kaj ne tuj malhelpis, sed "atente sekvis la preparojn por iumomente kapti la ĉefulojn", sed tiam ne plu povis haltigi ĝin.´´ -- Tio fakte estas proceduro uzata sufiĉe ofte de polico en diversaj landoj: oni scias, ke iuj organizas krimon, ekzemple kontrabandadon de narkotikoj, sed oni unue "atente observas" (kaj eĉ laŭeble helpas, sekrete), ĉar oni esperas, malkovri pli pri la organizanta grupo, kaj ke oni ekhavos la ŝancon, kapti la "grandajn fiŝojn": la ĉefuloj organizantaj. Ankaŭ tiam ofte okazas, ke la krima afero disvolviĝas tute ĝisfine (eĉ helpate de la polico), kaj oni "perdas la regadon" tiel, ke tiujn ĉefulojn oni ne kaptas.
Tiel, kredeble, la Usonaj sekretaj servoj petis, ke d-ro Abdul Qadeer Khan, kiu en 1983 en Nederlando estis kondamnita al 4 jaroj da malliberejo pro ŝtelo de nukleaj sekretoj kaj provo pri spionado, ne estu efektive malliberigita. La tiama ĉefministro Ruud Lubbers antaŭ ne longe rakontis, ke pro peto "el Usono" oni liberigis lin ("pro eraro de formo en la akuzo", por ke "la Usonanoj" povu "atente observi" liajn pluajn agojn. Nun tiu d-ro Khan estas konata kiel "la patro de la Pakistana atombombo" (nacia heroo!), kiu (malpli heroe) vendis "nuklean kapablecon" al pluraj aliaj landoj, inkluzive Iranon. Juĝistino Anita Leeser, kiu en 1983 membris en la tribunalo, kiu kondamnis lin, antaŭ ne longe volis, por refreŝigi sian memoron (pro tio, kion Lubbers diris), rigardi la koncernan dosieron, kaj montriĝis, ke tiu dosiero malaperis el la arĥivo sen ajna noto aŭ spuro. (Laŭ la arĥivisto, tiama kaj nuna, io tia ankoraŭ neniam okazis.)

D. ``Usonaj rondoj sciis, ke iuj Arabaj rondoj planas Atakon al la Turoj, kaj faris ĉion por ne malhelpi, ĉar ĝi estis precize la terorisma atako, kiun ili bezonis por siaj celoj.´´ -- La menciitaj eks-ministroj menciis plurajn punktojn, kiuj sugestas, ke la Usona registaro (respektive la reakciaj rondoj, kun kiuj ĝi rilatis/as) aktive malhelpis al la (ebla) prevento de tiu Atako, ĉar ĝi precize estis tiu "nova Pearl Harbor", pri kiu (jam en 2000) esperis tiuj, kiuj strebis/as al regado de la mondo fare de Usono (kaj kiuj sub/apud/super Bush estas membroj aŭ konsilistoj de la registaro). (Nur pro tia "nova Pearl Harbor", la Usonaj civitanoj pretus/is pligrandigi la armeon (kaj eĉ iniciati militojn) post la disfalo de Sovetunio.) [Post kiam Japanio en 1941 atakis Pearl Harbor (Perlo-haveno) en Havajio, Usono ekpartoprenis en la Dua Mondmilito. Antaŭe, la ĝenerala sento en Usono estis, ke oni en tiun ne enmiksiĝu: kostus tro da mono kaj tro da vivoj.]
Kaj la eks-ministroj ilustras, ke la "milito kontraŭ terorismo" ne estas celata kontraŭ teroristoj, sed servas nur por vastigi la mondregadon fare de Usono kaj Usonaj entreprenoj. (Ekzemple: jam antaŭ la Atako al la Turoj, oni volis armee okupi Irakon. La Atakon al la Turoj oni uzis kiel pretekston por plenumi tiun planon, dum ekzistis neniuj indikoj, ke Irako havis ajnan rolon en tiu Atako. Islamismaj teroristoj aperis en Irako nur post kiam Usono okupis ĝin.) -- Por pli da argumentoj, guglu la nomojn de la de eks-ministroj, aŭ legu iliajn paperajn publikaĵojn.

Kompreneble neniu eksterulo konas la tutan veron. Ĉiuokaze interpreto A estas forĵetinda, ĉar plene kontraŭa al la ĝis nun koniĝintaj faktoj. Interpreto B eĥas iujn film-scenarojn, kio nenion diras pri ĝia ebla vereco, kvankam la imagpovo de film-scenaristoj ofte montriĝis sufiĉe trafa. Interpretoj C, Ĉ kaj D (kaj ankaŭ B) almenaŭ havus siajn paralelaĵojn en la konata konduto de registaroj, politikistoj, polico kaj sekretaj servoj alilokaj kaj alitempaj.

나는 너에 합의한다 이다. 그것은 이렇게 이다.